John na Ali ni wanafunzi wa shule za msingi. John anasoma shule ya Amani katika mkoa wa Tabora, na Ali anasoma shule ya Jamhuri, katika mkoa wa Dar-es-Salaam. John na Ali wapo likizo, na wanakutana mkoani Iringa

John: Hujambo Ali?

Ali: Sijambo, habari za Tabora?

John: Nzuri tu. Habari za Dar-es-Salaam?

Ali: Salama kabisa. Ninyi mmefunga shule kwa muda gani?

John: Sisi tumefunga shule kwa muda wa mwezi mmoja, na ninyi je?

Ali: Na sisi tumefunga kwa muda wa mwezi mmoja. Vipi mitihani ilikuwaje?

John: Mitihani ilikuwa mizuri tu, nimefaulu vizuri . Nimekuwa mtu wa tatu darasani.

Ali: Mimi pia nimefaulu vizuri. Nimekuwa mtu wa pili.

John: Mkifungua shule utaingia darasa la ngapi?

Ali: Tukifungua shule nitaingia darasa la saba. Na wewe je?

John: Mimi nitaingia darasa la tano.

Ali: Ninyi shuleni kwenu mnavaa sare za rangi gani?

John: Wasichana wanavaa mashati meupe na sketi za bluu, na wavulana wanavaa mashati meupe na kaptula za bluu.

Ali: Sisi pia tunavaa kama ninyi.