Lugha ni chimbuko la utamaduni. Utamaduni unazingatia pia nyimbo na ngoma za wenye utamaduni. Nyimbo na ngoma ni sehemu muhimu sana katika utamaduni wa waswahili na waafrika kwa ujumla. Huko Unguja kuna aina nyingi za ngoma na nyimbo ambazo zinasisitiza utamaduni wa wakazi wa sehemu hii.

Ngoma hizi huchezwa na wanaume na wanawake kama tutakavyoona. Ngoma wanazotumia hutengenezwa na wenyeji wenyewe. Hawanunui ngoma zao kutoka nchi za nje. Kabla ya kuanza kuzipiga ngoma hizi wanaziweka karibu na joto la moto. Baada ya ngozi kupata joto inavutika na huwa na mlio mkali zaidi. Twende tuwatazame wachezaji hawa.

Ngoma hii inaitwa ngoma ya msewe. Huchezwa na wanaume na wanawake. Wanaume huvaa kofia, shati, na kikoi na Wanashika fimbo. Wanawake huvaa gauni na kufunga kanga kiunoni. Ngoma hizi huchezwa hasa katika sherehe Za kijadi kama vile jando na katika harusi.