Kwa desturi, watu wengi hupendelea kula chakula kilichopikwa nyumbani. Kama tulivyoona katika somo la kwanza na somo la pili, uhusiano wa kifamilia ni muhimu sana katika utamaduni wa waafrika. Familia hukaa pamoja na kula chakula cha siku pamoja. Kwenda mgahawani ni namna ya kujistarehesha. Mara moja moja, familia, au mmoja wa familia anaweza kwenda mgahawani kula na kunywa na marafiki. Wakati huu hupata nafasi ya kukutana na watu wengine, kupashana habari na kuzungumza mambo mengi ya siasa na maisha. Kwa sehemu kubwa ni wanaume wanaokwenda mgahawani kula na kunywa. Wanawake wengi hawawezi kwenda mgahawani mara kwa mara kwa sababu ya wajibu wao katika familia. Wanaweza kwenda wakati wa sherehe au siku za mapumziko ya kazi kama Jumapili, au sikukuu za dini na serikali.